नेकपा (माधव–प्रचण्ड) समुहका स्थायी कमिटि सदस्य तथा सुदूरपश्चिम ईन्चार्ज भीम रावलले प्रधानमन्त्री केपी शर्मा ओलीले नियुक्त गरेका नयाँ मन्त्रीहरुलाई चोरलाई साँचो दिईएको कटाक्ष गरेका छन् । धनगढीमा आयोजित विरोध सभालाई सम्बोधन गर्दै रावलले काठ तस्करीमा मुछिएका सासंद प्रेम आलेलाई वनमन्त्री बनाएको बिषयलाई र्इंगित गर्दै चोरको हातमा साँचो दिईएको टिप्पणी गरेका हुन् ।
उनले वर्तमान सरकारले कतिपय व्यक्तीलाई चोरलाई साँचो दिए जस्तो मन्त्री पद दिएको टिप्पणी गरे । डाक्टर भीम रावलले कर्तव्यच्युत भएकाहरु पनि गुलियो चाट्नका लागि मन्त्री भएका बताए । विरोध सभामा बोल्दै उनले भने–‘प्रतिनिधि सभा सदस्य समेत नरहेका कतिपय व्यक्तीहरु गुलियो चाट्न लज्जापूर्वक मन्त्री भएका हुन ।’
प्रधानमन्त्री केपी शर्मा ओलीले संविधानलाई कुल्चिएको उनले बताए । प्रधानमन्त्रीले प्रतिनिधि सभा विघटन गर्ने कुनै अधिकार नभएको बताए । ‘पदबाट राजिनामा दिनुपर्ने अवस्थामा उल्टै मन्त्रीमण्डलको विस्तार गरे, प्रतिनिधि सभा सदस्य नभएका मान्छेलाई समेत मन्त्री बनाएर लोकतन्त्रको धज्जी उडाउने काम गरे ।’ उनले विरोध सभामा भने ।
नेता रावलले वर्तमान सरकारले देशभक्तिको ठूलठूला कुरा बोल्ने गरे पनि व्यवहारमा भने कमजोर रहेको टिप्पणी गरे । लिम्पियाधुरा, कालापानी र लिपुलेक समेटिएको नक्सा पनि प्रधानमन्त्रीले बाध्य भएर प्रकाशित गरेको उनले बताए । ‘नक्सा किन चाहियो ? नक्सामा चुच्चे भूमि राख्नै पर्छ र ? भनेर उहाँले प्रश्न गर्नुहुन्थ्यो ।’ रावलले भने–‘हामीले सदन र देशभक्त जनताले सडकबाट दबाब दिएपछि मात्रै उहाँले बाध्य भएर नक्सा प्रकाशित गर्नु भएको हो ।’
सम्बन्धित वर्गका समाचारहरू
