धनगढी : ट्रकको ठक्करबाट मृत्यु भएकाका परिवारलाई क्षतिपूर्ती दिनुपर्ने र दोषीलाई कारबाहीको माग राखेर स्थानीयले पूर्व पश्चिम राजमार्गको लम्की खण्ड अवरुद्ध गरेका छन् । दिउँसो ट्रकले मोटरसाइकललाई ठक्कर दिँदा एक जनाको घटनास्ठलमै र एक जनाको उपचारका लागि लैजाने क्रममा मृत्यु भएपछि स्थानीयले राजमार्ग अवरुद्ध गरेका हुन् । 

जिल्लाको लम्कीचुहा नगरपालिका-१० मा ५ख८४०६ नम्बरको ट्रकले लु ७८ प ३९०५ को नम्बरको मोटरसाइकललाई ठक्कर दिँदा मोटरसाइकल चालक सोही नगरपालिकाको वडा नम्बर ४ बलियाका २४ वर्षीय दिनेश चौधरीको घटनास्थलमै मृत्यु भएको थियो । मोटरसाइकलमा सवार जानकी गाउँपालिकाकी १८ वर्षीया सन्ध्या चौधरी घाइते भएकी थिइन ।

उनको उपचारका लागि कोहलपुर लैैैजाने क्रममा मृत्यु भएको जिल्ला प्रहरी कार्यालय कैलालीका प्रवत्ता डिएसपी प्रतीक बिष्टले जानकारी दिए । त्यसपछि राजमार्ग अवरुद्ध भएको उनले बताए । 

प्रहरीले ठक्कर दिने ट्रक र चालकलाई नियन्त्रणमा लिएको छ ।