पुर्व मन्त्री स्वर्गीय टेकबहादुर चोखालको सम्झनामा दोस्रो निसर्ग अस्पताल टेकबहादुर चोखाल स्मृति कप हुने भएको छ । निसर्ग अस्पतालको मुख्य प्रायोजनमा फुटसल प्रतियोगिता धनगढीमा हुन लागेको हो ।
टेकवहादुर चोखाल फाउण्डेसनको आयोजना र अभि मिडिया ईभेन्ट्स एण्ड स्पोर्टसको व्यवस्थापनमा कार्तिक १३ गतेदेखि १५ गतेसम्म धनगढी उपमहानगरपालिका र गोदावरी नगरपालिका वडाका टीमहरु सहभागी हुने फुटसल प्रतियोगिता हुने टेकवहादुर चोखाल फाउण्डेसनका अध्यक्ष विनय चोखालले जानकारी दिए ।
धनगढी उपमहानगरपालिकाका र गोदावरी नगरपालिकाका विभिन्न वडाहरु टिम बनाएर खेलमा सहभागिता हुने र टीमका खेलाडी सम्बन्धित वडाकै हुनुपर्ने उदपि एक वडाबाट एकभन्दा वढी टीम पनि सहभागी हुन सक्ने अध्यक्ष चोखालले बताए । उनले युवाहरुलाई फुटसलतिर आकर्षण वढाउनका लागि विभिन्न खेलकुद हुँदा हुँदै पनि टेकबहादुर चोखाल स्मृति कप फुटसल प्रतियोगिता आयोजना गरिएको जानकारी दिए ।
‘पहिलो संस्करणमा धनगढी उपमहानगरपालिकाका वडाका टीमहरु मात्रै सहभागी गराएर प्रतियोगिता गरेका थियौं । दोस्रो संस्करणमा छिमेकी गोदावरी नगरपालिकाका वडाका टीमहरु पनि थप गरेका छौं ।’ फाउण्डेसनका अध्यक्ष चोखालले भने–‘आगमी दिनमा प्रतियोगितालाई विस्तारै अन्य क्षेत्रहरुमा पनि फैलाउँदै लैजानेछौं । पुरस्कार राशी पनि हरेक संस्करणमा बृद्धि गर्दै लैजानेछौं ।
प्रतियोगिताको मुख्य प्रायोजक निसर्ग अस्पतालका अध्यक्ष तिर्थ पन्तले फुटसलको माध्यमले स्वास्थ्यमा सुधार हुने बताए । उनले यसक्षेत्रको खेलकुद विकासका लागि अस्पताल सधैं तयार रहेको बताए । पहिलो संस्करणलाई पनि निसर्ग अस्पतालले नै मुख्य प्रायोजनको रुपमा सहयोग गरेको थियो ।
दोस्रो निसर्ग अस्पताल टेकबहादुर चोखाल स्मृति कपको विजेताले नगद ५० हजार सहित ट्रफी मेडल पुरस्कार प्राप्त गर्नेछ भने उपविजेताले नगद नगद २५ हजार सहित ट्रफी मेडल पुरस्कार प्राप्त गर्नेछ । त्यस्तै प्रतियोगिताको उत्कृष्ट खेलाडी, उत्कृष्ट गोलरक्षक र सर्वाधिक गोलकर्ताले पनि नगद सहित ट्रफी मेडल पुरस्कार प्राप्त गर्नेछन् । पहिलो संस्करणको विजेताले नगद ३० हजार सहित ट्रफी मेडल तथा उपविजेताले १५ हजार नगद सहित ट्रफी मेडल पुरस्कार प्राप्त गरेका थिए । प्रतियोगिता धनगढीको फ्ल्याटल्याण्ड फुटसलमा आयोजना हुने टेकवहादुर चोखाल फाउण्डेसनले जनाएको छ ।
को हुन टेकवहादुर चोखाल ?
टेकवहादुर चोख्याल नेपाली राजनितिज्ञ र नेपाली काग्रेंसका प्रभावशाली नेताको रुपमा परिचित छन् । नेपाली काग्रेंसबाट २०५६ सालमा चोख्याल साविकको कैलालीको निर्वाचन क्षेत्र नम्बर ४ बाट विजयी भएका थिए । त्यसको ३ बर्षपछि शेरवहादुर देउवा प्रधानमन्त्री हुनुभएका वेला चोख्याल कानुन मन्त्री समेत बनेका थिए ।
२०६४ सालको पहिलो संविधान सभाको निर्वाचनमा साविकको कैलाली निर्वाचन क्षेत्र नम्बर ६ बाट नेपाली काग्रेंसको तर्फबाट संविधान सभा सदस्यको उम्मेदवार पनि रहेका थिए । नेपाली काग्रेंसका नेता तथा पुर्व मन्त्री टेकवहादुर चोख्यालको २०६६ कार्तिक २७ गते काठमाण्डौंमा निधन भएको थियो । चोख्यालका एक श्रीमति दुई छोरा र एक छोरी छन् ।
सम्बन्धित वर्गका समाचारहरू
