सुदूरपश्चिम प्रदेशका थप १० जनाले कोरोना जितेका छन् । प्रदेशको सामाजिक विकास मन्त्रालयका सूचना अधिकारी हेमराज खड्काले शुक्रवार थप १० जनाले कोरोना जितेको जानकारी दिए । उनका अनुसार बझाङबाट सात र कञ्चनपुरका तीन जना जनालाई शुक्रवार डिस्चार्ज गरिएको हो । योसंगै प्रदेशमा पाँच हजार सात सय २४ संक्रमितले कोरोना जितेका छन् ।

प्रदेश स्वास्थ्य निर्देशनालय डोटीका अनुसार अहिलेसम्म सबैभन्दा धेरै संक्रमित रहेको कैलालीका एक हजार ६ सय ७६ जना निको भएर घर फर्किएका छन् । यस्तै डोटीका नौँ सय २८, अछामका नौँ सय १२, कञ्चनपुरका ६ सय ९५ जना संक्रमित निको भएर घर फर्किएको दावी स्वास्थ्य निर्देशनालयले गरेको छ ।

बाजुराका चार सय ४२ जना, बझाङका तीन सय ८३, बैतडीका तीन सय २६, डडेल्धुराका तीन सय १६ र दार्चुलाका ४५ जना संक्रमित पनि डिस्चार्ज भएका छन् । स्वास्थ्य तथा जनसंख्या मन्त्रालयका अनुसार सुदूरपश्चिम प्रदेशमा कोरोना संक्रमितको संख्या ६ हजार सात सय ५३ रहेको छ । संक्रमण पुष्टि भएका १५ जना संक्रमितको मृत्यु भईसकेको छ ।