खप्तड छ पनि गजवको । महिना जुन सुकै होस, खप्तडको सुन्दरता सधै उस्तै हुन्छ । कवि मवीवी शाहले रारालाई लिएर लेखेको कविता, राराकी अप्सरा जस्तै । सुन्दर अनि मनमोहक ।
यतिबेला भने खप्तड बिछट्टै सुन्दर छ । हरिया पाटन । पाटनको चारैतिर सुरक्षा कवच जस्ता कोणधारी बृक्ष । तिनै पाटन ढाक्ने गरी फुलेका रंगीचंगी भुईफुलहरु । भुईफूल गलैचा झै फैलिएका छन् । खप्तड यतिबेला साच्चिकै गजव छ । हेरी रहु लाग्ने भुईफूलहरु, जहाँ लडीबुडी खेल्न मन लाग्छ ।
जति हेरेपनि धीत नमर्ने पाटनको सुरन्दरता । कोणधारी बृक्ष हुदै आकाशमा फैलिएको बादलको गुजुल्टो । निलो आकाश र हरिया पाटनका खप्तडका बीचमा फैलिएका बादलका गुजुल्टा । कम्ति रमणीय छैन, यतिबेला खप्तडको दृष्य । त्रिवेणीलाई दाया पारेर अझ आफ्नै गतिमा बग्ने त्यो नदीको कलकल आवाज ।
घोडाहरु चरिरहेको दृष्य कम्ति मनमोहक छैन । खप्तड पुग्दा हुने थकान र कष्ट त्यहाँ पुगेपछि जो सुकै बिर्सिन्छ । खप्तडको भ्रमणमा रहेकी बाजुराको बुढीनन्दी नगरपालिकाकी उपप्रमुख सृष्टि रेग्मीले खप्तडलाई भू स्वर्गको संज्ञा दिदै तस्वीरहरु सामाजिक सञ्जालमा पोष्ट गरेकी छन् । भूस्वर्ग खप्तड यतिबेला पर्यटकको पर्खाईमा छ ।
तस्वीर सौजन्य : सृष्टि रेग्मी (उपप्रमुख, बुढीनन्दी नगरपालिका, बाजुरा)
सम्बन्धित वर्गका समाचारहरू
