धनगढी- धनगढी उप–महानगरपालिका वडा नम्बर १० को वडा कार्यालयमा गरिएको तालाबन्दी खुलेको छ । वडा कार्यालयले ज्यालादारी कर्मचारीलाई बिना कारण निकालेको भन्दै स्थानीय बासीले गरेको तालाबन्दी खोलिएको हो । 

मेयर उपमेयर र प्रशासकीय अधिकृतसँग छलफल पछि जिल्ला प्रशासन कार्यालयलाई पत्र काटेर स्थानीय प्रहरीले ताला खोलेको वडाध्यक्ष शिवकुमार रानाले बताए । उनले सबैको सहमतिमा ताला खोलेर सेवा प्रवाह गरेको बताए । 

यता आन्दोलनकारीले भने आफुहरुको सहमति विना ताला खोलेको आरोप लगाएका छन् । उनीहरुले आफुहरुलाई कुनै जानकारी नदिएर ताला खोलेको बताएका छन् । आफुहरुलाई छलफलका लागि नबोलाएर एकलौटी रुपमा ताला खोलेको आन्दोलनकारी मध्येका एक अजुध्या रानाले बताए । तर वडाध्यक्ष शिवकुमार रानाले भने छलफलमा बोलाए पनि सम्पर्कमा नआएको बताए ।