सुदुरपश्चिम प्रदेशमा कोरोना भाइरसको शंकास्पद गरिएकाहरुको पीसीआर परीक्षणको रिपोर्ट चार दिनसम्ममा आउने भएको छ । यसअघि कोरोना परीक्षणको रिपोर्ट ५ देखि ७ दिनसम्म लाग्ने गरेको थियो । प्रदेशको सामाजिक विकास मन्त्रालयका अनुसार नमुना संकलन कम हुँदा परीक्षणको दर घटेको हो । स्वास्थ्य तथा जनसंख्या मन्त्रालयका सहप्रवक्ता डाक्टर समीर अधिकारीका अनुसार पछिल्लो समय नमुना संकलन कम हुँदा परीक्षण कम भएको हो ।
सामाजिक विकास मन्त्रालयका स्वास्थ्य शाखा प्रमुख नरेन्द्र कार्कीले कोरोनाका शंकास्पद व्यक्तीहरुको पीसीआर परीक्षणको रिपोर्ट अहिले ३ दिनदेखि ४ दिनमा दिने गरेको बताए । नमुना संकलन धेरै भए काठमाडौं पठाउनुपर्ने अवस्था आए परीक्षणको रिपोर्ट एक सातामा लाग्ने उनले जानकारी दिए । उनले भने, “दैनिक यति नै नमुना संकलन गरिन्छ भन्ने छैनन्, तर आवश्यकता र अवस्था हेरेर परीक्षण गदै आएका छौं ।”
उनका अनुसार कोरोना परीक्षण घटेको छैन । धनगढी स्थित सेती प्रादेशिक अस्पतालको प्रयोगशालामा ३ सयसम्म परीक्षण हुने गरेको छ भने ५० देखि ६० वटासम्म डडेलधुरा अस्पतालको प्रयोगशालामा हुने गरेको छ । एक हजार ६५७ वटा नमुना परीक्षणको पालो कुरेर बसेका स्वाब (होल्ड) रहेको उनले बताए ।
उनका अनुसार पहिला ३ हजारको हाराहारीमा नमुना होल्ड हुँदा परीक्षण गर्न राष्ट्रिय जनस्वास्थ्य प्रयोगशाला पठाउने गरिएको थियो । “कोरोना संक्रमण समुदायमा फैलिएको छैन, भारतबाट आएकाहरु क्वारेन्टिनमा राख्ने गरिन्छ, क्वारेन्टिनमा बसेको १० दिनपछि हामीले परीक्षण गछौँ,” उनले भने, “भारतबाट पनि दैनिक आठ सयदेखि एक हजारसम्म आउने गरेका छन् ।”
सम्बन्धित वर्गका समाचारहरू
