प्रधानमन्त्री कप एकदिवसीय राष्ट्रिय क्रिकेट प्रतियोगितामा सुदूरपश्चिम प्रदेशले लगातार दोस्रो हार व्यहोरेको छ । सुदूरपश्चिम प्रदेशले आज आफ्नो दोस्रो खेलमा विभागीय टोली नेपाल पुलिस क्लबसँग फराकिलो अन्तरको हार व्यहोरेको हो । पुलिसले भने पहिलो जित निकालेको छ । पुलिससँग सुदूरपश्चिम प्रदेश ९ विकेटले पराजित भएको हो ।
कीर्तिपुरस्थित त्रिवि क्रिकेट मैदानमा सुदूरपश्चिमले दिएको १११ रनको सामान्य लक्ष्य पुलिसले १७ ओभरमा १ विकेट गुमाउँदै पूरा ग¥यो । पुलिसका लागि सुनील धमलाले अर्धशतकीय पारी खेले । ५७ बल खेलेका उनले ६ चौका र २ छक्काको सहयोगमा ५३ रन बनाए । त्यस्तै, कुशल भुर्तेलले पनि अर्धशतकीय पारी खेले । ४४ बल खेलेका उनले ९ चौका र १ छक्कासहित ५१ रन बनाए ।
बलिङतर्फ सुदूरपश्चिमका लागि हेमन्त धामीले एक विकेट लिए । यसअघि, टस हारेर पहिले ब्याटिङ गरेको सुदूरपश्चिमले ३१ ओभर १ बलमा सम्पूर्ण विकेट गुमाउँदै ११० रन बनाएको थियो । सुदूरपश्चिमका लागि खडक बोहोराले सर्वाधिक ४० रन बनाए । त्यस्तै, सन्जु धामीले ३५ रन बनाउँदा अरुण ऐरीले १३ रन जोडे ।
बलिङतर्फ पुलिसका लागि सागर ढकालले ४ विकेट लिए । १० ओभर बलिङ गरेका सागरले तीन मेडन ओभर फालेर १८ रन खर्चे । त्यस्तै, दीपेन्द्रसिंह ऐरीले पनि ३ विकेट लिए । दीपेन्द्रले ६ ओभर १ बल बलिङ गरेर दुई मेडन ओभर फाल्दै १० रन खर्चे । जितसँगै पुलिसले समूह ‘बी’मा दुई खेलबाट २ अंक जोडेको छ । सुदूरपश्चिमको भने यो दोस्रो हार हो ।
सम्बन्धित वर्गका समाचारहरू
