जहाँ

अहंमताको चिण्डो बजाइरहेका सम्राट छन्  

आरती उतारी रहेका तिनका भाटहरू छन्  

गौंडागौंडामा, घुम्तीघुम्तीमा

घाटो हेरिरहेका मुकुण्डेहरू छन्  

Edit Ad

अनि छन्  

चूक पोखिएजस्तो चिन्ताको आकाश ओढिरहेका मनहरू  

जो धागोबाट फुत्केर किनारा लागेको घुयँत्रोझैं

हेर्दाहेर्दै अडेस लगाइरहेका छन्  

जिन्दगीलाई नै किनारमा

सम्राटहरू कसैलाई केही सोध्दैनन्  

कसैको बारेमा केही बुझ्दैनन्  

कसैलाई चिन्दैनन्  

मौका पाउँदा लुछिदिन्छन् देशका सपेटा

जसरी लुछिरहन्छ गिद्धले सिनो

तिनले देश मात्रै कहाँ

लुछिरहेका छन्, गरिबका सपना पनि

देउसरा !  

यहाँ अझै आइसकेको छैन

तिमीले सोचेजस्तो परिवर्तन

त्यो त्यही नैपाल हो जहाँ भेटिन्छन्  

सम्राटको हैकमले

भयभित बनेर काँपिरहेका

सिद्धार्थ आउजीहरूका पाइतालाका छाप।